کلاچی میں سیکیورٹی فورسز کے آپریشن کے دوران فائرنگ کے تبادلے میں 2 دہشتگرد اور جنوبی وزیرستان میں 1 دہشت گرد ہلاک ہوگیا، جب کہ شمالی وزیرستان میں بم پھٹنے سے 26 سالہ سپاہی شاہ زیب شہید ہوگیا۔
پاک فوج کے شعبہ تعلقات عامہ (آئی ایس پی آر) کے مطابق ڈیرہ اسماعیل خان کے علاقے کلاچی میں انٹیلی جنس پر مبنی آپریشن کے مطابق شدید فائرنگ کے تبادلے میں 2 دہشت گرد مارے گئے، جب کہ جنوبی وزیرستان میں بھی کارروائی کے دوران ایک دہشت گرد ہلاک ہوگیا۔
آئی ایس پی آر کے مطابق مارے گئے تینوں دہشت گردوں سے اسلحہ اور گولہ بارود برآمد ہوا، دہشت گرد مختلف کارروائیوں میں ملوث تھے۔
آئی ایس پی آر نے بتایا کہ شمالی وزیرستان کےعلاقےغوریوم میں دیسی بم پھٹ گیا، جس کی زد میں آکر پاک فوج کا 26 سالہ سپاہی شاہ زیب شہید ہوا۔
آئی ایس پی آر کے مطابق علاقے کو دہشت گردوں سے پاک کرنے کیلئے آپریشن جاری ہے، سیکیورٹی فورسز دہشت گردی کو ختم کرنے کے لئے پرعزم ہیں، جوانوں کی قربانیاں ہمارےعزم کو مزید مضبوط کرتی ہیں۔