واشنگٹن: امریکہ نے حماس کے حملوں کیخلاف اسرائیل کی حمایت کا اعلان کر دیا۔ امریکی صدر جو بائیڈن نے اسرائیل حماس جنگ پر کہا کہ اسرائیل پر یہ حملے سراسر شیطانی عمل ہے۔
امریکی صدر جو بائیڈن نے امریکی قوم سے خطاب کرتے ہوئے کہا کہ حماس خون کا پیاسا ہے ، جو کچھ اسرائیل میں دیکھنے میں آیا ہے اس نے داعش جیسی تنظیموں کے بدترین مظالم کی یاد تازہ کر دی ہے۔
امریکی صدر نے کہا کہ ایک ہزار سے زائد اسرائیلیوں کو قتل کیا گیا جن میں 14 امریکی شہری بھی شامل ہیں۔ امریکی صدر کا کہنا تھا کہ دکھ کی بات یہ ہے کہ اسرائیل سے آنے والی کچھ خبریں بہت المناک ہیں۔
امریکی صدر نے کہا کہ ہم اسرائیل کے ساتھ کھڑے ہیں۔انہوں نے کہا کہ اسرائیل کو وہ سب کچھ ملے جو ان حملوں کے جواب کے لیے اسے چاہیے۔
امریکی صدر جو بائیڈن نے اسرائیل کو ہر ممکن مدد فراہم کرنے کی یقین دہانی کرائی۔