فیس بک کے بانی اور چیف ایگزیکٹو آفیسر مارک زکربرگ امریکی تاریخ کا سب سے بڑا گھر تعمیر کر رہے ہیں۔
میل آن لائن کے مطابق مارک زکربرگ 27 کروڑ ڈالر (تقریباً ساڑھے 76 ارب روپے) کی لاگت سے امریکی ریاست ہوائی میں یہ گھر تعمیر کر رہے ہیں۔
گھرمیں 5 ہزار مربع فٹ رقبے پر محیط زیرزمین بنکر بنایا جائے گا۔ یہ گھر امریکی تاریخ کا سب سے بڑا ذاتی تعمیراتی منصوبہ ہے۔ مارک زکربرگ نے 2021ء میں اس جزیرے پر 110 ایکڑ زرعی رقبہ خریدا تھا۔ مارک زکر برگ اور ان کی اہلیہ پریسلا چن کے پاس پہلے بھی 1300 ایکڑ زرعی رقبہ تھا۔جس کی مالیت 10 کروڑ ڈالر تھی۔
اس گھر میں بنائے جانے والے دو بنگلے 57 ہزار مربع فٹ پر محیط ہوں گے۔ گھر میں 30 بیڈ رومز، 30 باتھ رومز، کانفرنس رومز اور ایک انڈسٹریل کچن ہو گا۔ گھر میں بنائے جانے والے تمام بنگلوں کو زیرزمین سرنگوں کے ایک نظام کے ذریعے باہم منسلک کیا جائے گا۔
زیرزمین بنکر میں دھات سے بنے ساﺅنڈ پروف دروازے لگائے جائیں گے۔ کنکریٹ کی دیواریں بم پروف بنائی جائیں گی۔ گھر میں کئی گیسٹ ہاﺅسز، جم، متعدد سوئمنگ پولز، ہاٹ ٹب، ٹینس کورٹ اور دیگر کئی چیزیں بنائی جائیں گی۔ اس گھر کے مکینوں کو کسی بھی چیز کے لیے گھر سے باہر جانے کی ضرورت پیش نہیں آئے گی۔