فیڈرل گورنمنٹ ایمپلائیز ہاؤسنگ اتھارٹی نے ملک کے8بڑے شہروں میں سرکاری ملازمین اور عام لوگوں کے لیے نئے رہائشی منصوبے شروع کرنے کا منصوبہ بنایا ہے۔
ایف جی ای ایچ اے کے ذرائع نےسرکاری خبر رساں ادارے کوبتایا کہ اتھارٹی کو میگا منصوبوں میں دلچسپی رکھنے والے زمین مالکان، کمپنیوں اورمختلف فرمز کی جانب سےمتعدد درخواستیں موصول ہوچکی ہیں۔
انہوں نے کہا کہ اتھارٹی جڑواں شہروں راولپنڈی اور اسلام آباد سمیت ملک کے آٹھ بڑے شہروں میں نئے رہائشی منصوبے شروع کرنے کی منصوبہ بندی کر رہی ہے، دیگر شہروں میں لاہور، پشاور، کوئٹہ، ملتان، فیصل آباد اور کراچی شامل ہیں۔
انہوں نے مزید کہا کہ نئے ہاؤسنگ منصوبے وفاقی حکومت کے ملازمین اور عام لوگوں کے لئے مشترکہ منصوبے کی بنیاد پر شروع کیے جائیں گے۔