سپریم کورٹ جمہوریت کو ڈی ریل ہونے سے بچائے گی، چیئرمین پی ٹی آئی

 اسلام آباد: چیئرمین پی ٹی آئی بیرسٹر گوہر نے کہا ہے کہ سپریم کورٹ جمہوریت کو ڈی ریل ہونے سے بچائے گی۔

اڈیالہ جیل راولپنڈی کے باہر میڈیا سے گفتگو کرتے ہوئے انہوں نے کہا کہ ہم کسی صورت الیکشن میں تاخیر نہیں چاہتے۔ فری اینڈ فئیر الیکشن کے لیے آراوز کا ہونا ضروری ہے۔ ہماری استدعا تھی کہ آر اوز جوڈیشل سے لیے جائیں۔

بیرسٹر گوہر کا کہنا تھا کہ پی ٹی آئی کو کٹہرے میں کھڑا نہیں کیا جاسکتا، لیکن سختیاں کی جارہی ہیں۔ ہم ہرروز سپریم کورٹ بیٹھے رہتے ہیں کہ جمہوریت کو ڈی ریل ہونے سے بچائیں۔ ان شا اللہ سپریم کورٹ جمہوریت کو ڈی ریل ہونے سے بچائے گی۔  انہوں نے کہا کہ توشہ خانہ کیس میں سابق چیئرمین کا جوڈیشل ریمانڈ دیا گیا ہے۔ یہ کیس بوگس ہے اور سیاسی انتقام پر بنایا گیا ہے۔

انہوں نے کہا کہ ہمارے ورکرز کو جیلوں میں بار بار نظر بند کرنے کے معاملے کو بھی دیکھنا چاہیے۔ پی ٹی آئی واحد جماعت ہے جو چاہتی ہے کہ جمہوریت کو ڈی ریل ہونے سے بچائے۔ اگر آپ پٹیشنرز کو نوٹس جاری کرنا شروع کریں تو انصاف کی فراہمی میں رکاوٹ ہو گی۔ سپریم کورٹ نے  8 فروری کو الیکشن کروانے کا کہہ کر اچھا اقدام کیا۔ ہمیں آج بھی کنونشن میں شرکت یا جھنڈوں کی اجازت نہیں ہے ۔

بیرسٹر گوہر نے کہا کہ یہ عوام کا حق ہے کہ وہ کس کو چننا چاہتے ہیں ۔ ہم نے کبھی نہیں کہا کہ ہمیں انصاف ہوتا ہوا نظر نہیں آ رہا۔ ہمیں جن کیسز میں نقصان ہوا وہ اس لیے ہوا کہ وہ سنے نہیں جا رہے۔ پی ٹی ائی الیکشن کا کبھی بائیکاٹ نہیں کرے گی۔ ہم کوشش کررہے ہیں کہ اپنے انتخابی نشان سے الیکشن لڑیں ۔ الیکشن کمیشن نے شیڈول کے بعد لیول پلیئنگ فیلڈ فراہم کرنے کی یقین دہانی کرائی تھی۔ ہم اس فیصلہ سے مطمئن نہیں ہیں،ہم چاہتے ہیں سپریم کورٹ آر اوز عدلیہ سے رکھوا دیتی ۔ ہماری تیاری اور ہوم ورک مکمل ہے۔ جتنی مشکلات میں ہم مہم چلا رہے ہیں، اگر لیول پلیئنگ فیلڈ ملے تو دو تہائی اکثریت ہماری ہو گی۔