مشیگن: امریکا میں ایک 45 سالہ شخص نے اپنی سالگرہ سے چند دن قبل ایک لاکھ ڈالرز کی لاٹری جیت لی۔
امریکی ریاست مشیگن کے شہر اسٹرلنگ ہائیٹس سے تعلق رکھنے والے سافا بیہنم نے مشیگن لاٹری انتظامیہ کو بتایا کہ وہ اپنے انعام نہ جیتنے والے لاٹری کے ٹکٹوں کو مشیگن لاٹری ایپ میں ہمیشہ اسکین کرتے ہیں تاکہ ان کے پاس جیتنے کا دوسرا موقع باقی رہے۔
ان کا کہنا تھا کہ وہ 500 ایکس منی میکر گیم اس امید پر کھیلتے ہیں کہ وہ 60 لاکھ ڈالرز کے انعامات میں سے کوئی ایک جیت سکیں اور بعد میں وہ ٹکٹ جس پر انعام نہیں نکلتا ان کو اسکین کر لیتے ہیں۔
متواتر کوششوں کے بعد سافا بیہنم بالآخر 30 نومبر کو ہونے والی ایک قرعہ اندازی میں ایک لاکھ ڈالرز کا انعام جیتنے میں کامیاب ہوئے۔
بہنم نے بتایا کہ وہ لاٹری سے جیتی گئی رقم سے اپنے خاندان کو چھٹیوں پر میکسیکو لے جانا چاہتے ہیں۔
سافا بیہنم نے بتایا کہ انہیں ایک ای میل موصول ہوئی جس میں لکھا تھا کہ وہ ایک لاکھ ڈالرز جیت گئے ہیں لیکن انہیں لگا کہ یہ ان کے ساتھ دھوکا کیا جا رہا ہے۔ جب لاٹری آفس کو کال کی تو معلوم ہوا کہ انعام حقیقت میں نکلا ہے۔
ان کا کہنا تھا کہ ان کی سالگرہ چند ہی دنوں میں ہے اس لیے سالگرہ سے پہلے یہ بہترین تحفہ ہے۔