اسلام آباد: چیئرمین پی ٹی آئی نے 9 مئی پُرتشدد واقعات پر حضرو اٹک میں درج مقدمے کی تحقیقات کے لیے جیل آئی پولیس ٹیم کے سوالات کا جواب دینے سے انکارکر دیا۔
ایکسپریس نیوز کے مطابق ضلع اٹک حضرو میں درج 9 مئی کے واقعات کے حوالے سے درج مقدمات کی تفتیش کے لیے حضرو پولیس ٹیم سابق وزیراعظم اور سابق وزیر خارجہ سے تفتیش کے لیے اڈیالہ جیل پہنچی۔ چیئرمین پی ٹی آئی نے پولیس ٹیم کی جانب سے پوچھے گئے کسی بھی سوال کا جواب دینے سے انکارکر دیا۔
عمران خان نے تفتیش کے لیے وکلاء سے مشاورت یا ان کی موجودگی میں جواب دینے پر اصرار کیا۔
پولیس ٹیم 9 مئی واقعات میں سابق وزیراعظم اور سابق وزیر خارجہ سے تفتیش کے لئے اڈیالہ جیل آئی تھی۔ قبل ازیں راولپنڈی، گوجرانوالہ، قصور اور فیصل آباد کی پولیس ٹیمیں بھی 9 مئی واقعات سے متعلق چیئرمین پی ٹی آئی سے جیل میں تفتیش کر چکی ہیں۔